維拉提早3年續約艾美利　要曼聯徹底死心

英超勁旅阿士東維拉近年成績起飛，據報球會準備為領隊艾美利獻上新合約，提早3年就想長遠綁住呢位西班牙名帥，目的相當明確，就係要擋走曼聯嘅挖角，令「紅魔鬼」徹底死心！

最近有傳聞指，曼聯有意搵艾美利接替卡域克執教，咁啱今個星期維拉就要作客曼聯。喺這個關鍵時刻，維拉喺社交媒體宣布，近日同艾美利展開未來組軍會議，雙方都同意長期合作。

維拉高層同艾美利日前進行會議，商討未來發展策略，維拉發聲明表示：「會談集中喺維拉長遠發展策略，結果非常正面，艾美利決心同球會共同打造球會未來，去到2029年及更長時間。」

據英國《太陽報》報道，艾美利同維拉張合約去到2029年，為免曼聯之後挖角，球會將提早3年向艾美利開出新合約，而且已獲維拉班主沙維利斯拍板，曼聯似乎可以死咗條心。