阿仙奴冬窗增兵　有兩大目標

阿仙奴今個夏天增兵唔順利，收購摩根羅渣士同雲尼斯奧斯祖利亞都撻Q，據報佢哋嚟緊冬季轉會市場會再出手，吼實兩大目標，分別係般尼茅夫嘅高洛比，同埋RB萊比錫嘅安東尼奧紐沙。
英國傳媒報道，阿仙奴今夏鋒線僅買入謝索利斯，但就有加比爾馬天尼利、李安度杜沙特離隊，尼華尼利外借，鋒線兵源難免緊張，如果想要維持好成績，冬窗有增兵必要。

兵工廠增兵目標有兩個，先講般尼茅夫嘅高洛比，該位20歲法國小將上季加盟般茅，表現愈見進步，至今上陣38場入13球，現時身價高達7,000萬歐元（約6.1億港元）。

RB萊比錫嘅安東尼奧紐沙身價稍低，估計值4,500萬歐元（約3.9億港元），不過RB萊比錫暫時無意放該位21歲挪威攻擊手離隊，想買佢可能要一番游說。