[东方报]歐冠：防線大穿窿曼聯難收科

今晚歐聯早場有科木主場對曼聯。「紅魔鬼」近6場未贏過，今場贏唔贏到好難講，反而留意到佢哋近4次歐洲賽對意甲兵全開4球或以上；歐聯「新丁」科木頭2場都開出大比數，相信今場入波唔會少，轉捧3.5球入球大最明智。（Now 638周四凌晨零時45分直播）

曼聯上仗歐聯2球不敵馬德里體育會後，利辛度馬天尼斯炮轟管理層，話佢哋增兵不力，雖然「利馬」已就事件道歉，但難免軍心動搖，上場聯賽「玫瑰打吡」被列斯聯逼和後，領隊卡域克帥位更加危危乎，內部亂象持續，今場客Ｗ風險唔低。

再睇曼聯今場陣容，單箭頭麥比奧莫，有般奴費南迪斯、拉舒福特同阿密特迪亞路作輸送，進攻火力唔差，不過問題係後防，左閘已經唔夠人，今場仲有約羅停賽，要由達洛治客串，右閘就用小將艾登希雲，擺明唔想撈嘅利辛度馬天尼斯就繼續正選，後防咁嘅環境好難唔失波。

科木踢歐聯特別開放
科木今季初次進軍歐聯，首仗主場大勝RB萊比錫4比1，上輪作客飛燕諾一度領先，激戰下倒輸2比3，似乎球員踢歐聯特別開放，進攻組合杜域卡斯同尼高柏斯都有好表現，今場隨時又演入球騷，入球大放心捧。