[东方报]英超：鋒將嘥餐士主帥搞唔掂 熱刺冇攻開捱細界

今輪英超壓軸戰，熱刺主場硬撼高雲地利。兩隊係現時英超入波最少球隊，熱刺前線更加係成班大嘥鬼，難怪淪落榜尾，高雲地利雖然兩連勝，但造訪倫敦都唔敢冒進，3.5球入球細乃不二之選。（Now 621周二凌晨3時直播）

熱刺今季踢咗6場聯賽，除咗首輪慘吞賓福特3蛋表現差勁，其餘5場都有個共通點：入局快佔上風，但腳頭無靈入唔到波，轉頭失守，搞到只得3和3負未贏過，淪為護級球隊。呢支北倫敦勁旅查實創造咗唔少攻門機會，可惜前線嘅蘇蘭基、古度斯、馬莫殊、沙雲奴等都係大嘥鬼，好似箭頭蘇蘭基上仗對曼聯雖然臨尾攻入扳平士哥，但之前錯失兩次良機，難怪熱刺6輪過後入得3粒咁大把，5次開3球或以下，主帥迪薩比盡做都搞唔掂，真係欲哭無淚。

高地作客唔敢亂谷
另邊廂，事隔25年終於重返英超嘅高地，經歷頭4輪輸晒嘅慘烈開局後，近兩輪接連擊敗諾定咸森林同紐卡素，總算止跌回穩，贏波除咗將士用命外，當然與森林同「喜鵲」表現不濟有關，不宜太高估。尤其係高地6輪入咗5粒，其中4球係嚟自上仗贏紐卡素，可見進攻唔係咁叻，難得打番起信心，今遇熱刺梗係想保住勢頭，作客一定踢穩陣波，加上兩隊係依家英超入波最少球隊，今仗唔慌多波入，入球細更可取。