奪命門將面臨誤殺指控

特內里費前鋒迪米基爾日前喺西乙聯賽，被FC安道爾門將奧禾奴膝撞胸口，心臟驟停送院後不幸身亡。西班牙警方周三介入調查，呢位「殺人門將」有可能面臨過失殺人（誤殺罪）。

事發喺補時階段，奧禾奴衝到中場線附近解圍，跳起用膝頭撞向迪米基爾，後者倒地隨即送去醫院搶救，可惜返魂乏術。西班牙警方表示案件屬於非自然死亡，按當地法律須展開司法調查，睇吓係咪涉及過失殺人。

不過，當地首席檢察官指出，由於碰撞發生喺比賽當中，最終刑事起訴機會不大，調查係要睇奧禾奴有冇「故意傷人」意圖；根據當地刑法，如果因為「重大過失」導致他人死亡，仍可能被控誤殺。