【官宣】施多夫出山教波　幫哥連泰斯護級

巴甲哥連泰斯宣布，邀請荷蘭名宿施多夫出山，擔任球隊主教練，合約至2027年底。不過施多夫當務之急係先幫球隊護級，保住巴甲席位。

50歲嘅施多夫2019年率領喀麥隆出戰非國盃後再冇教波，近年擔任足球評述居多，哥連泰斯巴甲8連敗後，會方解僱主教練甸尼斯，邀請施多夫接手救亡。

施多夫表示：「接受今次挑戰係我嘅榮幸，同時責任重大。我將傾盡全力，打造一支為每一分每一秒、每一場勝利而戰嘅球隊。」

哥連泰斯早前曾與荷蘭國腳前鋒迪比出現合約糾紛，雖然最後雙方和解，但球隊成績大倒退，迪比今季亦僅交出1入球2助攻，至於今季新簽入連格，亦僅交出2入球1助攻，表現平平。

施多夫埋位，要激活上述兩位球星打護級戰，任務艱巨。