卡域克1場定生死　法媒驚爆曼聯密斟迪甘斯

曼聯周中歐聯戲劇性反勝羅馬，為領隊卡域克「吊命」，不過英國傳媒爆料，國際賽前最後1戰主場對阿士東維拉，將成為卡域克嘅生死戰，若果再失手就幾乎肯定落鑊。法國傳媒更驚爆，「紅魔鬼」已接洽前法國領隊迪甘斯接手！

權威記者D**id Ornstein透露，曼聯早前經歷9場不勝兼連場大敗，仍然未炒卡域克魷魚，除咗因為球迷仍然支持卡域克外，「市場機會」不足亦係一大原因，球會對拿高斯文、干地、艾迪侯域都有顧慮，真正心儀嘅靴斯拿同艾美利又難以挖角，所以寧願按兵不動。

雖然歐聯贏波為卡域克稍為舒壓，但如果嚟緊再輸畀維拉，有機會由依家17位跌落降班區，炒魷事在必行。法國著名記者Santi Aouna爆料，曼聯已接洽58歲嘅迪甘斯，佢今夏世盃後離開法國隊，雖然十幾年冇教過球會，但佢以往教摩納哥、祖雲達斯同馬賽都有佳績，領軍能力獲得肯定。

不過，曼聯嘅算盤未必打得響，Aouna指迪甘斯對接受曼聯聘約興趣唔大，佢更希望執教一間狀態穩定、營運健康嘅球會，原來迪甘斯最想執教皇家馬德里，不過皇馬就選擇咗摩連奴，依家迪甘斯亦唔急於復出，打算睇定慢慢揀。