科木狂轟9球創歷史　法比加斯一戰封神

周四(5日)凌晨歐聯出現震撼戰果，意甲奇兵科木作客9比1重創朗斯，追平歐聯史上最大勝利同單場入球紀錄，依家壓倒一眾豪門升上第4位。呢支7年前仲喺意丁掙扎嘅球隊，搖身一變成為歐洲最恐怖球隊之一，西班牙少帥法比加斯一戰封神！

勇不可擋嘅科木，半場已由杜域卡斯(2球)同尼高柏斯入波領先3比0，佢哋上輪4比1大炒曼聯，法比加斯承認後悔喺尾段下令球員「收油」，今場科木就吸取教訓，下半場畀力再入多6球，柏柏施奧利喺補時入嘅第9球，更令科木改寫多項歷史。

科木單場入9球，追平拜仁慕尼黑喺2024年9比2贏薩格勒布戴拿模紀錄，同時亦係歐聯最大勝仗，利物浦(2007年)同皇家馬德里(2015年)分別贏過8比0。連中三元嘅杜域卡斯、1射2傳嘅尼高柏斯當然搶鏡，但科木有7個球員入波、7個球員有助攻，全能足球先係精髓。

科木喺2019年仲踢緊意丁，破產邊緣被印尼富商收購，原本諗住買嚟畀印尼年青球員落班，拍電視綜藝節目，點知愈搞愈認真，搵咗唔少球星加入，包括3年前請到法比加斯領軍，佢上任即帶隊由意乙升上意甲，升班第1年穩坐第10位，上季歷史性躋身歐聯，依家仲創造歐聯歷史。

法比加斯賽後表示：「科木美妙一夜！我哋好多球員都係足球生涯起步，佢哋要腳踏實地，虛心咁去學習，唔可以預期所有事都一帆風順。當我睇到科木最後2輪，對手係巴黎聖日耳門同巴塞隆拿，我知我哋要盡快搶夠分數，前面仲有漫長嘅路。」