曼城炒利物浦回應作弊風暴　爭議紅牌惹怒火

曼城115項財務違規罪名成立後，周日(11日)首度出戰英超作客利物浦，晏菲路球場怒火充斥、掛滿抗議橫額，不過曼城就用行動證明，佢哋仍然所向披靡，趁利物浦踢少個下連入3球大勝3比0，英超6戰全勝續排榜首；利物浦領隊伊拉奧拿賽後炮轟紅牌判決，將形勢完全扭轉。

曼城「帶罪」出賽被球迷狂噓，利物浦亦搶到主動權，不過喺阿歷山大伊沙克、加普同蘇保斯拉爾因傷缺陣下，攻門入肉程度不足，利維斯古馬斯單刀同賴恩格雲貝治遠射，都被基安盧基當拿隆馬救出。62分鐘出現轉捩點，格雲貝治拍波撞跌謝利美杜古，球證竟出第2面黃牌趕佢出場。

踢多個嘅曼城3分鐘後即破僵局，艾寧夏蘭特禁區內勁射破網，68分鐘杜古左路扣大位射成2比0，78分鐘卓基錦上添花。曼城領隊馬利斯卡風騷表示：「我哋要學識應付外面嘅『噪音』，嘗試用贏波發聲，就好似今場。完場只得曼城球迷唱緊歌，所以今場嘅『噪音』嚟自曼城，唔係利物浦！」

格雲貝治嘅紅牌成為勝負關鍵，伊拉奧拿賽後炮轟球證判決：「今日踢咗2場比賽，紅牌前係第1場，我哋表現非常出色；紅牌後係第2場，曼城好過我哋。格雲貝治第1張黃牌只係最普通嘅犯規，完全冇嘢；第2個犯規我完全唔明點解要黃牌，當時我哋9個球員已經返去防守；10個打11個係非常困難！」