3
这个楼主还没有留下简介。
回复讨论
0
登录后可参与回复讨论。
3
曼聯開季成績慘淡，中堅利辛度馬天尼斯喺上場歐聯輸波後，猛烈炮轟總監韋確斯引發地震，據報事件亦令更衣室撕裂，出現兩派陣營對立。馬天尼斯周四(15日)同曼聯高層會面後，再次發出聲明，但只係為「發聲時間」道歉，而唔係為講嘅內容後悔，消息指呢位阿根廷國腳已決心等季尾約滿離隊。
馬天尼斯喺日前歐聯輸畀馬體會後，公開批評韋確斯增兵不力，鬧曼聯人腳差難同列強相比，呢番言論除咗矛頭指向總監外，部份曼聯球員亦覺得被拖落水。英國《天空體育》報道，至少有1個隊友喺回程航班上，已當面質問馬天尼斯，而據《太陽報》消息，引起馬天尼斯爆炸嘅球員，係客串左閘嘅小將艾登希雲。
《太陽報》引述消息人士指：「馬天尼斯覺得搵希雲踢左閘，完全反映出曼聯組軍係幾咁失敗，佢覺得全部責任都係管理層。」不過名宿加利尼維利就認為：「馬天尼斯可能講得啱，但如果你係希雲同約羅，見到個世盃冠軍球星咁講會點諗？馬天尼斯公開咁講，等如公開話隊友唔夠班！」
曼聯大軍周四復操，馬天尼斯被曼聯高層召見後，連續第2日發出聲明，今次終於「跪低」道歉，不過內容就好詭異，聲明嘅Story竟然有「AI標示」，而馬天尼斯只係承認：「我同領導層及領隊有正面會談，大家都知我係感性、熱情嘅人，輸波嘅沮喪引發我當時嘅言論，個時間同地點或者唔合適，我作出道歉。」據報馬天尼斯同時會被罰款處分，球員就取消原定嘅聚餐活動。
據《The Athletic》報道，馬天尼斯同曼聯嘅合約去到明年夏天完結，雖然球會有權延長合約1年，但28歲嘅馬天尼斯就唔想續約，希望以自由身離隊。巧合嘅係，馬天尼斯喺2022年離開阿積士前，亦曾經公開炮轟阿積士總監係「無名小輩」，冇幾耐之後就被賣去曼聯。
