吞車路士兩蛋　曼聯直插深淵

英超早場曼聯又輸波，作客車路士輸0比2，各項賽事9場未贏過，總計6負3和，聯賽9戰得7分繼續刷新開季最差下限，車路士全取3分後，暫以16分重上前4。

曼聯今仗有曾鬧矛盾嘅隊長般奴費南迪斯復任正選，批評過管理層嘅利辛度馬天尼斯亦喺後防領軍，車路士則有高爾彭馬復出，祖奧柏度養傷之下，「新尼馬」艾斯迪華奧今季聯賽首次擔正。

上半場各食1次詐胡，先有車路士艾斯迪華奧入球被判無效，後有曼聯馬菲奧斯根夏入波空歡喜，不過總計曼聯攻勢較多，阿密特迪亞路兩次單刀埋門敗家射失，另有般奴費南迪斯門前射高，半場踢成0比0。

下半場初段車路士打破僵局，摩根羅渣士50分鐘射成1比0，64分鐘利辛度馬天尼斯禁區內犯規食第2張黃牌被逐兼輸12碼，高爾彭馬操刀射成2比0，其後艾斯迪華奧入波雖再食詐胡，但對大局冇影響，車路士贏2比0完場。