亡羊補牢　曼聯冬季搶購巴塞中場取代般費

曼聯英超又輸1場，9戰只有7分，僅以較多淨得入球，力壓同分嘅水晶宮，排尾四位置，勉強處於護級線之上，開始捲入降班旋渦。紅魔鬼好大機會炒領隊卡域克之外，亦有必要趁明年1月轉會市場重開增兵。根據英國《每日郵報》爆料，曼聯將巴塞隆拿中場費明盧比斯列為頭號目標，估計呢位23歲西班牙國腳身價達7,000萬鎊(約7.3億港元)。

曼聯今季成績急插水，其中一個主因係中場大腦般奴費南迪斯表現嚴重走下坡，佢上季英超35次披甲入9球及21次助攻，打破英超史上單季最多次助攻紀錄。呢位葡萄牙國腳今季英超8次上陣入3球及1次助攻，但全部都係8月對葉士域治一役取得，換言之，佢其餘7場聯賽冇入波，亦冇助攻，上場對車路士，上半場浪費1次黃金機會，否則紅魔鬼未必輸。

般奴費南迪斯早前公開批評卡域克戰術部署，影響球隊士氣，加上佢已經32歲，將於明夏約滿，進一步增加會方簽人取代般費嘅決心，並睇中費明盧比斯。司職進攻中場嘅費明盧比斯傳射能力出眾，為巴塞一陣累積上陣149場入38球及34次助攻，包括今季13次披甲入6球及6次助攻，踢法及位置都係般費最佳代替人選。

不過，費明盧比斯身為巴塞主力，會方未必願意季中出售佢，估計曼聯起碼要開出7,000萬鎊轉會費，先至有得傾。此外，巴塞隆拿想簽利辛度馬天尼斯，紅魔鬼可能用呢位中堅作為交易籌碼。