謝拉特盼賽會褫奪藍月冠軍

曼城因115項財務違規罪成，引發球壇地震，利物浦傳奇球星謝拉特最近喺節目上開腔，呼籲英超賽會必須褫奪曼城喺涉案期間奪得嘅所有冠軍頭銜，要令曼城「受番相應嘅苦」，但強調自己英超無冠嘅遺憾已冇辦法彌補。

無法彌補無冠遺憾
謝拉特曾經喺2013至14球季帶領利物浦做英超亞軍，當年冠軍正正係「出術」嘅曼城，謝拉特表示：「我唔會要曼城球員還番個獎牌，咁樣係唔正確，但曼城呢間球會要被褫奪冠軍，就算唔褫奪冠軍，都要喺紀錄上打個記號，等所有人知道佢哋嘅榮耀係用咩方法嚟獲得。曼城未來亦要繼續受到懲罰，我唔知點樣先係合適，罰佢哋降班，對英冠球隊都唔公平，可能罰佢哋長時間嘅扣分、禁買，等佢哋承受番以往9年、10年其他球隊所受嘅苦。」

謝拉特足球生涯未贏過英超，但佢就話褫奪曼城冠軍，都彌補唔到呢個遺憾：「我要求嚴懲曼城，唔關我想拎英超冠軍事，因為感覺已經唔一樣，我唔會搞巴士巡遊、唔會叫基爾獲加畀番個冠軍獎牌我，我接受自己生涯所取得嘅成就。」