C朗激動反擊　入波助艾納斯大勝

葡萄牙巨星C朗喺歐國聯「離隊波風」之後，首次上陣比賽，立即用行動證明實力，喺周六(10日)凌晨沙特職射入1球，協助艾納斯主場以3比0大勝迪里耶會。賽後呢位41歲老將心情激動，眼泛淚光向球迷致謝，可見佢近期承受極大心理壓力，呢個入波總算為自己省番靚招牌。

C朗今仗擔任正選上陣，並且表現活躍，開波初段頭槌頂前，隊友沙姆哥斯達起腳，被對手護空門。戰至23分鐘，京士利高文遠射被門將撲出，C朗第一時間補射入網，為艾納斯打開紀錄，今季聯賽7次披甲入4球，將職業生涯總入波數字增加至980球，距離千球大關又行一步。跟住另1位葡萄牙國腳祖奧菲歷斯開出角球，沙姆哥斯達頂入成2比0。

換邊之後，沙迪奧文尼送出直傳，京士利高文單刀射入，為艾納斯奠定3比0勝局，打破近2場賽事不勝悶局，今季聯賽8戰6勝1和1負，追至同榜首艾卡迪沙同分。完場之後，C朗走到場邊向球迷致謝，並且眼濕濕，似乎對於「離隊波風」百感交雜。

C朗早前發表「千字文」公開擅自離開葡萄牙國家隊嘅來龍去脈，並願意接受處罰。葡萄牙足總周五(9日)公布各項判罰內容，並冇提到C朗，似乎仍然需要深思熟慮。日前有消息指葡國足總只會罰C朗禁止參加國際賽1個月，11月中仍然可以參加歐國聯。