涉及巨額贊助費　葡國足總唔敢罰C朗

C朗願意為日前歐國聯擅自離開葡萄牙國家隊一事接受處罰，但葡國足總仍然未作出判罰，即使周五(9日)公布多項判罰內容，都冇提及C朗。據悉葡萄牙足總大部分收入同C朗號召力有關，一旦佢退出國家隊，勢必打擊足總財政。

葡萄牙足總2024/25年球季收入為1.53億歐元(約13億港元)，當中絕大部分來自贊助商、電視轉播、商業授權，各大集團及品牌願意向足總開出「肥約」，好大程度上睇中C朗商業價值，因為葡萄牙有呢位巨星上陣，可以吸引傳媒及球迷關注，發揮重要宣傳作用。C朗早前表示，今屆世盃結束後，已經決定退出國家隊，但獲足總會長極力挽留，相信同經濟利益有關。

C朗今次擅自離隊，根據足總規則，面臨被罰禁止參加國際賽1至6個月，如果係一般球員觸犯，相信足總可以迅速判決，但考慮到C朗超然地位，擔憂重罰佢，可能影響同贊助商關係，甚至出現「撤資潮」，因而遲遲未肯下手，似乎想「冷處理」，將財政負面影響減至最低，難怪有傳C朗只會被罰停賽1個月，剛好趕及出戰11月中旬歐國聯，變相「冇停賽」。