7
这个楼主还没有留下简介。
回复讨论
0
登录后可参与回复讨论。
7
尋日早上國際熱身賽，阿根廷主場以3比0大勝貝寧，39歲球王美斯上演國家隊告別戰，展現無私奉獻精神，並冇掛住自己入波，而係貢獻兩次助攻，造就另一位老將奧達文迪建功，加上妙傳「接班人」尼高柏斯入波，有承前啟後意義。最後美斯主射12碼入網埋齋，正式為21年國際賽生涯劃上句號。
賽事原定香港時間早上7時開波，但由於為美斯舉行致敬儀式，導致延遲展開。有8萬人入場見證美斯告別，佢以正選披甲，聯同拿達路馬天尼斯、祖利安艾華利斯合組鋒線攻堅，全世界都以為美斯會把握最後一次為國出征，盡量入波「刷數據」，但畫面並冇出現，兩隊上半場互交白卷。
12碼埋齋3蛋贈貝寧
換邊後僅3分鐘，美斯立即「嚟料」開出角球，由奧達文迪射入打開紀錄，呢位38歲中堅今年7月已經宣布退出國家隊，今仗同樣係佢嘅國際賽告別戰，美斯不忘造就呢位合作多年戰友入波，留下美好回憶。踢到61分鐘，美斯又為隊友鋪橋搭路，右路盤球之後，橫傳畀禁區頂嘅尼高柏斯射入世界波。呢位22歲新星近年迅速冒起，助科木爆冷取得歐聯入場券，被視為美斯接班人，今仗獲得前輩傳送，並射入靚波，有繼承美斯衣缽意義。戰至71分鐘，球迷最期待畫面出現，阿根廷獲得12碼，當然交由美斯操刀，佢不負所望，勁射入網，鎖定208次為國家隊上陣入126球及67次助攻。
史卡朗尼暗示續約領軍
賽後阿根廷一眾球員同粉絲都留喺球場，聆聽美斯講話，呢位39歲神鋒話：「唔知點講好，我首先想起過身嘅爸爸，同埋多謝大家，可以着阿根廷球衣21年，係我一生最驕傲嘅事，即使陷入最差時候，都未停止奮鬥，唔可以再為國家隊比賽，的確非常痛苦，其實我想一世都留喺國家隊，但現在係時候離開，多謝你哋。」
美斯亦特別提到今屆世盃4強對英格蘭，極之難踢，並否認阿根廷今屆世盃獲國際足協偏幫。美斯演講期間，世盃決賽被逐嘅安素費南迪斯不禁落淚痛哭，似乎好唔捨得呢位「大佬」。
另外，阿根廷主帥史卡朗尼已經執教阿根廷8年，合約將於今年12月約滿，佢會唔會同美斯一齊離開備受關注，雖然「史Sir」曾透露完約後可能會暫停工作，不過佢喺賽後就突改口風：「如果計劃順利進行，我將繼續執教阿根廷。」
