【官宣】阿迪達再教4年　裝新約木箱大有來頭

英超今個星期戰火重燃，衞冕嘅阿仙奴再上征途前先報喜訊，領隊阿迪達正式續約至2030年，據報年薪高達2,000萬鎊，係英超最高薪領隊。阿仙奴喺簽約儀式入面，特別用一個古老木箱裝住份合約，原來呢個木箱大有來頭，係阿仙奴嘅「家傳之寶」！

阿迪達喺2019年首次擔任領隊，就係接掌沒落嘅阿仙奴，當時「兵工廠」只排第9位，陣容又充斥高薪冗員；阿迪達經過多年改革，上季終於重奪英超冠軍兼殺入歐聯決賽，阿仙奴亦決定高薪同佢續約，班主高安基表示：「阿迪達同球會創造一段神奇旅程，我哋決心未來幾年製造更多美好記憶。」

阿迪達呢份新約由一個木箱裝住，而呢個古董木箱有段故！話說阿仙奴原本係一間木球會，喺1886年成立足球部嗰陣，首任秘書屈堅斯獲贈呢個木箱做紀念品，個木箱打開仲可以變成張寫字檯，估唔到經過140年，個木箱仍完好無缺，亦被視為球會嘅「家傳之寶」。

阿仙奴CEO加歷克表示：「我哋同球會嘅根一直相連，可以用呢個木箱向阿迪達呈上新合約，同時向阿仙奴嘅歷史傳承致敬，我覺得好特別同好有意義。」