[东方报]歐國聯：比利時猛將回歸勝算高

同日A1組另一場，土耳其主場迎戰比利時。土耳其歐國聯頭4場輸晒，隨即換帥，未必咁快谷底反彈，加上之前作客比利時淨吞3蛋，可見兩隊實力有明顯差距，今仗返主場最多輸少啲，客勝仍然係首選。（周五凌晨1時開賽）

土耳其積弱換帥都冇用
土耳其今夏世盃小組包尾出局，已經面目無光，緊接住嘅歐國聯又4場輸晒，提前出局，來屆仲好大機會降班，結果執教3年嘅蒙迪拿被炒，請來比錫達斯名宿沙根耶仙接掌國家隊教鞭，今場係新帥上任首場賽事，不過球隊積弱已久，人腳亦無重大變動，繼續由查漢奴古同艾達古拿孭飛，對住星光熠熠嘅比利時，實在唔睇好。

另邊廂，比利時喺世盃8強出局後立即換帥，改由荷蘭名宿雲邦美領軍，球隊表現比上不足比下有餘，喺今屆歐國聯A1組，除咗對法國兩戰皆北外，對意大利同土耳其都喺明顯優勢下獲勝，包括上次主場大炒土耳其3比0，當時奇雲迪布尼梅開二度，前鋒盧卡古亦有進帳，加上今場仲有謝利美杜古傷愈歸隊，泰利文斯坐完波監復出，今場再贏土耳其冇問題，客勝穩開。