重建又重建　曼聯又有10人將被踢走

曼聯即將再度換帥，陣容亦將再度重建，據報現時紅魔陣中，至10名球員好大機會離隊，包括現任隊長般奴費南迪斯，前隊長哈利馬古尼亦冇得留低。

英國傳媒報道，4比4賽和阿士東維拉後，卡域克勢必下台，不過隊中多位球員都要為近期差劣表現孭鑊，換帥之後，曼聯下一輪大清洗亦會展開。

據報曼聯今次勢必徹底推倒重來，離隊10子名單亦出爐，計有：唔續約嘅隊長「攤手哥」般奴費南迪斯、「人形航母」前隊長哈利馬古尼、3位「玻璃腳」勞基梳爾、美臣蒙特同馬菲斯迪歷特、頻頻犯錯嘅達洛治、「廢太子」拉舒福特、「隱形人」曼紐爾烏加迪、「坦克臥底」利辛度馬天尼斯，同埋「水貨」約舒亞舒克斯。

上述10人各有不同問題，都係曼聯今季戰績差劣嘅部分原因，其去留將交由曼聯董事局同新主帥發落。