[东方报]英超：陣容不整玫瑰打吡鬥後勁 曼聯客戰列斯半和為貴

今晚英超焦點之戰，上演「玫瑰打吡」列斯聯主場火併曼聯。雙方屬於傳統宿敵，預料戰局將會非常緊湊，即使「紅魔鬼」整體人腳實力較強，但頹勢未止，已連續4場聯賽失分，傷兵多之餘仲要兼顧歐聯，球員必須謹慎分配體力，應會採取留前鬥後踢法。參考曼聯近5場英超上半場都打和，不妨再博半場和。（Now 621、622及611周日晚9時直播）

列斯聯今季表現相當硬淨，踢6場聯賽僅1敗，而且係作客不敵上季冠軍阿仙奴，該仗列斯聯唔只上半場成功抵禦「兵工廠」攻勢，打成平手，更於下半場入波領先，可惜最終倒輸1比2，實屬非戰之罪。

法基獲續約專恰卡域克
而且列斯聯跨季近7次聯賽主場出擊，取得4勝3和，地利優勢支持情況下，加上打吡戰面子攸關，應會額外落力，憑拚勁同對手周旋，有力同「紅魔鬼」抗衡。此外，列斯聯出戰「玫瑰打吡」前夕傳出好消息，據英國傳媒報道，列斯聯已經同領隊丹尼爾法基達成協議，雙方同意續約至2029年夏天，有助穩定軍心。根據OPTA統計，丹尼爾法基教波生涯，曾5次聯賽同曼聯主帥卡域克交鋒，獲得全勝，今仗再碰頭，至少半場頂得住曼聯來犯。

另邊廂，曼聯上周中歐聯作客0比2不敵馬體會，各項賽事連續5場不勝，至於近4場英超只有3和1負，上半場都係互交白卷，攻力相當疲弱。好大程度上係因為中場核心般奴費南迪斯狀態低迷，呢位上季英超助攻王近5次披甲都冇入波或者助攻，加上前鋒班捷文施斯高養傷，亦令鋒線失去衝擊力。

此外，明奈、勞基梳爾、柏德列多古等人都有傷在身，限制主帥卡域克調動選擇，加上曼聯將於周四凌晨歐聯作客科木，賽程非常緊密，難以每場都搏盡，估計會放慢比賽節奏，以免後勁不繼，上半場隨時又悶和。