卡華積有着落　將加盟基達菲

前皇馬隊長丹尼爾卡華積今夏約滿離隊之後，一直未有球會收留，現時終於有着落，根據「轉會權威」記者羅曼諾(Fabrizio Romano)爆料，呢位34歲右後衞已經同另1支西甲球隊基達菲達成口頭協議，預料短期內可以簽約。

丹尼爾卡華積離開效力13年嘅皇馬，一度傳出可能去沙特阿拉伯搵食，但最終冇下文，因為呢位前西班牙國腳傾向留喺西甲踢波。由於丹尼爾卡華積係自由身球員，可以隨時同其他球會簽約，佢近日已同基達菲達成口頭協議，並已經完成體測。

基達菲都係馬德里球隊，丹尼爾卡華積將來有大把機會同前皇馬隊友碰面。唯一障礙係基達菲仍然要等待西甲賽會財政審查，必須獲得當局批准，先至可以簽入丹尼爾卡華積。