8
这个楼主还没有留下简介。
回复讨论
0
登录后可参与回复讨论。
8
曼城被判115項財務違規，利用虛假合約造數涉款超過9億鎊，令球隊可以瘋狂燒錢打造巨星陣容。不過有錢都要買啱人，曼城周日(11日)作客3比0大炒利物浦，法國中場卓基嘅表現，就完勝身價1.16億鎊嘅域斯，「紅軍」名宿加歷查再次要求將域斯貶做後備。
曼城上年夏天原本全力收購域斯，點知最後關頭被利物浦天價截劫，曼城就退而求其次，用3,000萬鎊就簽入卓基。結果卓基踢到風生水起，域斯就愈踢愈迷失，今場卓基唔單止有入波，傳球成功率、射門、過人、爭搶都贏晒，域斯只係踢66分鐘，就有全場最高嘅17次失去控球權，表現令人失望。
早前已公開表示域斯「玩完」嘅加歷查，賽後再度開火：「我又要講域斯，上次我批評完佢之後，畀唔少利物浦球迷鬧我放負。域斯喺德國踢得好，但今場喺伊沙克同加普缺陣下，佢同巴高拿係需要挺身而出，帶領古馬斯同蒙路斯兩個新人，結果係兩個新人踢得仲好過兩個1億鎊球星。域斯已踢咗差唔多60場，冇得再賴，佢絕對唔應該出現喺利物浦正選。」
