公開離隊真相C朗不滿捷西斯食言

C朗日前為葡萄牙出戰歐國聯期間，盛傳不滿坐冷板，憤然離隊，並聲稱將於適當時候公開真相。呢位41歲射手兌現承諾，尋日凌晨發表聲明，指領隊佐治捷西斯兩次食言，由安排佢上陣時間，到之後向傳媒解釋內容，都同雙方事前討論唔同，感到不受尊重。

願受處罰再為葡軍披甲
C朗返回艾納斯後，正式發表近2,000字聲明，由今屆世盃講起，話葡萄牙出局後，已準備退出國家隊：「當時回程，我寫好退隊聲明，呢封信仍然保留至今，但獲得葡萄牙足總會長挽留，最終決定繼續為國效力，會長有問過我，聘請佐治捷西斯接手執教國家隊嘅意見，我都同意，其後佐治捷西斯約我見面，表明我仲係國家隊計劃一部分。」

嚟到最關鍵歐國聯，C朗表示佐治捷西斯賽事展開前，話安排佢踢首場及第4場，分別主場對威爾斯、挪威，期間兩場作客對丹麥、挪威，唔需要隨隊出征。C朗指原本已預咗兩場作客做後備，但佐治捷西斯有新安排：「對挪威之前，領隊問我可唔可以踢30分鐘，雖然超出我原本計劃，但我都答應，領隊最後冇派我上陣，我感到失落，賽後未有向球迷致謝，的確唔正確，需要道歉。」最令C朗不滿係佐治捷西斯原本答應喺記者會，澄清呢位巨星並冇要求上陣時間，但佢冇咁做，反而以強硬態度聲稱自己擁有用人嘅絕對權力，同兩人之前私下溝通內容截然不同。

C朗堅稱25年球員生涯，從未干預任何主帥戰術部署，但佐治捷西斯卻失信於佢，惟有離開。C朗表示當時離隊屬於無奈之舉，願意承擔責任，接受葡萄牙足總調查及處罰，希望「服刑」完畢後，繼續為葡萄牙比賽。