曼城「作弊風波」後首集結　名記爆英超罰扣60分

10月份國際賽期完結，早前爆出「作弊風波」嘅英超豪門曼城，115條財務違規被判罪成後，一眾國腳周四(8日)首度集結，領隊馬利斯卡將召集球員會面穩定軍心。據報曼城已向眾星拍心口保證「最後冇事」，不過有英國著名記者爆料，英超賽會已決定重罰曼城扣60分！

英國《曼徹斯特晚報》報道，曼城一眾國腳周四歸隊，備戰周日(11日)作客利物浦嘅大戰，馬利斯卡首要任務當然係釐清近日「作弊風波」，據報曼城喺英超宣判罪名成立後，已經聯絡4位領袖艾寧夏蘭特、魯賓戴亞斯、馬克古希同基安盧基當拿隆馬，保證球會「最後冇事」。

當拿隆馬經理人安素拉奧拿，日前率先向意大利傳媒透露：「曼城今次風波冇改變啲乜，球會已經同我哋傾過，所有人都好冷靜，司法程序按照計劃進行緊，當拿隆馬亦得到曼城再三保證，依家要專注嚟緊對利物浦同巴黎聖日耳門兩場大戰。」前領隊哥迪奧拿亦會喺下周歐聯亮相，用行動支持曼城。

英超宣布曼城115條財務違規罪成，但仍未作出判罰，《talkSPORT》著名主持Alan Brazil爆料，得悉英超已決定罰扣曼城60分：「我得到消息係曼城會被扣60分，兩個來自曼徹斯特嘅消息來源都係咁講，我唔敢話自己係獨家消息，亦唔知係咪今季執行，但我覺得時間緊逼，今季未必執行到。」