法蘭基迪莊復操　有望10月底復出

巴塞隆拿中場法蘭基迪莊7月被驗出右膝內側韌帶撕裂，原本估計需要抖5至6個月，幸好康復進度好過預期，近日已經復操，有望10月底復出參賽。

法蘭基迪莊近年經常受傷，為荷蘭出戰今屆世盃期間，膝部又出現問題，但仍然繼續上陣，導致傷勢惡化，7月返回巴塞隆拿報到，初時評估佢今年都唔可以復出。

根據西班牙《世界體育報》最新爆料，法蘭基迪莊近日可以參與衝刺跑步等無球訓練，佢亦喺社交網上載操練相片，情況甚為樂觀，如果一切順利，法蘭基迪莊有望10月底上陣。

巴塞隆拿今夏簽入洛迪卡斯簡迪之後，已經填補法蘭基迪莊嘅位置，即使佢傷愈，都未必可以獲得正選，相信教練費歷克唔會急於要求呢位「玻璃腳」復出。