利物浦右翼要人　準備冬季借用安迪歷

利物浦翼鋒加普今夏幾乎以8,500萬鎊(約8.8億港元)轉會費轉投曼城，但最終未能成事，導致現時左翼有人滿之患，但右翼人腳不足，根據「轉會權威」記者羅曼諾(Fabrizio Romano)爆料，利物浦準備明年1月冬季轉會市場重開後，增兵填補右翼空缺，並已有目標人物，打算借用皇馬新星安迪歷。

利物浦今夏簽入2位翼鋒巴特利巴高拿、域陀蒙路斯，加上加普、小將安古莫夏，4人最擅長位置都係左翼，領隊伊拉奧拿惟有從4人之中挑選1位擔任右翼，但發揮唔出以往穆罕默德沙拿作用，所以開始物色右翼人選，計劃冬季出手簽人。

羅曼諾指紅軍今夏已經睇中安迪歷，皆因呢位20歲巴西國腳技術全面，可以勝住右翼同正前鋒。安迪歷上季被皇馬外借去里昂，以為今季歸隊後，由摩連奴執教可以獲得重用，因而決定留隊，但結果都係長坐冷板。

西班牙《阿斯報》指安迪歷已準備好再次離開「銀河艦隊」，會方唔排除將佢外借，紅軍準備趁機出手接貨。